قبل كم يوم شفت كومنت على أحد الريلز اللي نزلناها من فترة. الكومنت من وحدة تقول: "مجتمعنا قائم على التجمعات والطلعات، ولذلك يصير صعب على الشخص نوعاً ما يطبق المرونة ويأكل اللي بخاطره، لأن الجمعات وايد وكل يوم بياكل اللي بخاطره." تقريباً هذا كان مضمون التعليق.
خلاني أفكر... الجمعات والطلعات فعلاً من أكبر العوائق أمام هدف خسارة الوزن، ومن أكثر الأشياء اللي "تتحلطم" بسببها البنات. ويوم قمت أفكر في الموضوع أكثر، شفت إن هذا مو بس عائق أمام خسارة الوزن، هو يعيق الوصول للكثير من الأهداف اللي الشخص يكون واضعها لنفسه، وأهني أنا أتكلم عن الأهداف اللي فعلاً تصب في تطور الشخص ومضيه للأمام على صعيد جسدي، فكري ومشاعري.
خلنا نكبّرها ونشوفها بوضوح أكثر
لأن البعض، الكثير في الواقع مو البعض، ما يتفق معاي في الرأي، لأن من بعيد التجمعات شكلها وايد حلو وممكن حتى تبين إنها مفيدة وتصب في وايد "خير". بس خلنا نسوّي زووم عليها شوي.
جمعة الأهل والأصدقاء، خلنا نكون وايد وايد صريحين وواقعيين، يصير فيها كل الآتي:
- مقارنات
- كلام على الناس
- ضغط من المحيطين
- تشويش
- مد عين
- مشاركة بزيادة عن اللازم
- كلام ما له داعي
- ...إلخ
وبنهاية الجمعة هذا كله يصب في مشاعر مو حلوة، تترجم إلى أفعال مو حلوة، ونظرة مو حلوة للحياة بشكل عام. اللي بدوره كله يخلي الشخص مو في أحسن حالة له عشان يعمل الأمور اللازمة لتحقيق الأهداف اللي يبغيها.
ليش هذا يأثر على وصولك لأهدافك؟
الأهداف اللي تستحق وقتنا وجهدنا، واللي فعلاً تصب في حياة رائعة، تتطلب من الشخص إنه يكون في أفضل حالاته الفكرية والمشاعرية.
فيصبح من الصعب جداً إن يوصل الشخص لأفضل نسخة من نفسه على صعيد جسدي وفكري ومشاعري، إذا أحاط نفسه بالكثير من الوقت بالأمور اللي تستنزف طاقته، تخليه مشوش، تخليه بوضع مقارنات، تخليه بدوامة عدم رضى، تخليه بدوامة ذنوب من كلام على الناس، وتخليه مشتت الوجهة.
الخلاصة
نعم، التجمعات فعلاً هي بناء اجتماعي قائم، والأغلب ينخرط فيه ويشارك فيه. ولكن إذا شفناه عن قرب جداً، بنعرف إن في أغلب الأوقات ما يقام بالشكل اللي يخدم الشخص وتطوره الفعلي.
فإذا كنتِ ترين نفسك وأهدافك الشيء المهم جداً في حياتك، أكيد تختارين إنك تقللين من التجمعات، وما راح تستخدمينها كعذر لعدم الالتزام وعدم وضع نفسك أولوية.
ومع الوقت راح تعرفين شنو الجمعات اللي عادي تكونين جزء منها، وشنو الجمعات اللي ما تشبهك ولا تخدمك. وبتعرفين عدد المرات اللي ممكن تشاركين فيها، وبتعرفين متى زاد الوضع عن اللزوم... وبهذه الطريقة مستحيل تطيحين في المشكلة اللي ذكرتها البنت وقلناها بأول المقال (الجمعات كثير ولذلك ما نقدر نكون مرنين).